Greemschnittä und Schgattälä

Sali Lara

Zerscht han i tenkt: «Äääba – äs ischt mr z heiss zäm Schriibä». Äs chund mr au nüüd zind. Äs ischt rüäbig bi ünsch und gröbäri Feriäplen he mr keini. Widr ämal in dr Schesäplanähüttä si mr gsi und natürli im Maiäsäss. Vam Ligäschtuäl us he mr zuägluägät wiä di Puurä chrampfend und schwitzend. I säg dr, da übrchuscht de grad äs brandschwarzs Gwüssni!! Gä hälfä in diä schtotzägä Börtr chan i au nid, will mis Chneu allpot usrenkt, wenn i schälb schtaa muäss.

I han diinä letscht Briäf noch ämal ggläsä und han gmerkt, dass allrlei scho no eendli ischt wiä früär. Äs heisst hüt nuu andrscht und allschisch ischt in ärä andärä Fason. I han asä jung au Chärtli i mä Holzchischtli kha, zwar handgschribni us Halbkarton, und Coffein han ii i mä Chachäli zuä mr gnu und nid wiä hüt, us ärä Büggs. Minä Liäblingsuufschtellr ischt Cocäcoolä gsi und i mir Züüchä* vam Pult ischt villä albig ä wiissi Tschuggäladä gglägä. Nu äs Reiäli han i nid chönä schpachtlä, nei i ha de grad di ganz uf z Mal gschpiislet. Drna is mr halbä schlächt gsi, abr äs hed de allimal nottä nid värrückt lang gwärrt, bis i widr Ggluscht kha ha uf mee.

Mini Bürokollegi und i hend au no ä psundäri Vorliäbi kha für Greemschnittä. Di sälbä he mr im Archiv hindr dä Kartonschachtlä vrschtekt und «oh Schwiiornig!», wenn nisch eini an dä Bodä khiit wer!! Will mä diä nid äso weidli, weidli und problemlos hed chönä in muulgrächti Schtückli zrglidärä, he mr nid Beedä uf z Mal chönä äs villis ins Archiv gä Schgattälä umrbiignä. Di eint hed albig müässä luägä, dass ds Büro ornigsgmess psetzt gsi ischt. Mä hed ja niä gwüsst, wenn dr Chef uftaucht. Also zä minä schtrengä Ziitä hed äs Wiibävolch nid ämal törfä i lengnä Hosä gä schaffä, bhüätisch i churznä de gra gar nid, ischt ja chlar!!! Muäscht gar nid lachä! Und etz han i im Fernsee grad ghört, dass ds Bikini 80-jerigs Jubileum fiiret. Zerscht sind diä nüümödäschä Badhäässi nu wiit äwägg va ünsch aagleid cho. Abr mid dr Ziit sind sch bis zu ünsch ins Prättägä cho. Das hed z läddärä gee, wa im Schwimmbad z Schiersch eini nu mid ärä Tüttichreezä und chleinä Höschäni aa umrgschtolziärt ischt. Dä meischtä hed s heimli gfallä, nu zuägee hed mäs nid törfä.

Ja, so is uf dr Wält: Ettlis ischt plibbä, mengs ischt vrschwundä, allrlei hed schi vrendärät, ä Teil ischt bessr, ä Teil ischt schlächtr. Di alfäbeetisch iigreiätä Chärtli hend miär gliäbät und i han dört au gärä mini Notizä iitreit, will ii i miir Meinig sövl hübsch ha chönä schriibä, halt alls i Schteischrift und äso hed s fascht au uusgsee wiä truckt. Janu, diä Chartä-Chischtläni sind bi denä Sachä, wa vrschwundä sind, drbii ischt dr Mensch vür m Kompiutr no da, wem ä au nid weiss, wiä lang äs no geid bis dr Robotr uf imschä Schtuäl hocket. Där plächig, gschtabbet KI-Kolleg würd denk sowiäso där Schtuäl bald nüd me bruchä und de muäss au är vrschwindä! I hoffä, dass no äs bitschi Läbä und Wermi bliibt in dr technisiärtä, digitalä Wält. Alls Guätä Lara und lass widr äppis lä khörä va dr.

Liäbi Grüäz Margrith

*Züüchä heisst: Schublade, Lade