Yazzy!
Hoi Margrith
Din letschti Briaf hät mr wieder amol bsunders gfalla. Wia heissts aso schön? Was isch besser als ai Cremeschnitta? Zwei. Do kenni au a huufa, wo u gära Cremeschnitta händ. A Fründin vu miar hät ihrem Papa, wo au so gära Cremeschnitta hät, sogar a Tischi bedrucka loh, wo genau dä Spruch drufstoht xD
Und was d Hitz agoht, kanni diar nu zuastimma. Dia aint Wucha, wos aso brutal heiss gsi isch, hani nüt anders macha könna als go bada go. Egal öb Badi, Baggersee oder sus a See. In da letschta paar Wucha bini an diversa Seea und Badis gsi. Am Partnunsee, in dr Badi Pany, in dr Badi Sand, am Bodasee, am Walasee, im Heidsee, am Baggersee in Trimmis, im Crestasee, im Lago Maggiore, unter amna kliina Wasserfall, im Lai Barnagn in Savognin und in dr Töss z Winti. Zu da kältischta Ort khörend dr Heidsee und d Badi Sand. Aber i bin glich huara gära döta. Mitama guata Buach, minem Giga-Rätselbuach undera Rundi Yazzy bini eigentlich überall happy. Au wenn mis Gegaüber öppadia bschiisst 😉
Jetzt wo d Prüafiga schu a bizali länger her sind und miar d Prüafigsresultat kriagt händ, kanni mini Feria endlich aso richtig gnüssa. Leider häz mit da einta Feria nit aso klappt, wia mrs plant ka händ – a Wasserschada im Airbnb – aber miar sind denn eifach aswo anderscht hi und händs au döta lässig kha. Derfür bini ez a paar Täg uf Italia an d Adria go bädala und Focaccia essa. Derno bini direkt witer an a kliises Openair mit a paar Fründinna, das hät u guat tua. So viel Lüt sind amigs no astrengend aber miar händ glich a luschtigi Zit ka.Bisch denn du au schu amna Openair gsi?
I wünscha diar witerhin a coola Summer und dass viel Moment häsch, wo «Yazzy!» rüafa wettsch!
LG
Lara
Über «Mid liäbnä Grüäz und LG» und die Autorinnen
Diese Kolumne zeigt den Briefwechsel zweier Frauen – eine hat gerade mit dem Studium begonnen, die andere ist im Ruhestand. Sie schreiben über Gott und die Welt und manchmal auch über das, was sie an der jeweils anderen Generation nicht so ganz verstehen. Sogar ihre Dialekte könnten unterschiedlicher kaum sein: Prättigauer Dialekt trifft auf Domleschger-/Churerdeutsch.
Margrith Ladner-Frei, geboren 1949, ist in Schiers-Schälleria aufgewachsen. Seit mehr als 50 Jahren lebt sie nun in Grüsch. Traditionen, alte Bräuche, Menschen und ihre Geschichten, Gesetze der Natur, die Schöpfung und ihre Kreaturen und besonders die Sprache der Walser interessieren die Schreiberin sehr. Sie hat schon einmal für die «Büwo» geschrieben und hat bereits viel Erfahrung gesammelt, was die Sprache und unsere Dialekte betreffen.
Lara Buchli, geboren im Jahr 2003, ist in Zizers aufgewachsen. Zur Zeit studiert sie an der ZHAW in Winterthur. Tiere, die Natur, Krimis und Horror findet sie super. Sie hat ihr Praktikum bei der «Büwo» absolviert und schreibt seit Jahren hobbymässig und konnte so bereits Erfahrung sammeln, was das Schreiben und die deutsche Sprache angeht.
Alle Beiträge der Kolumne
gibt es hier zum Nachlesen.