Härz- und andr Chäfärä

Sali liäbi Lara

So, ez bin i grad ä paar Tag z Schtäls (Stels) gsi. Höch übr m Prättigau, bim hübschtä Wättr. All Tag ds eimalägä Reetikonpanoramä für dä Augä! Das ischt uusägäli hübsch und da chascht ä so richtig d Seel lä bambälä. I han widr ämal erfaarä, wiä s ischt, we mä d Schuälbank trückt und mä mee odr wenigr folgä sötti. D Schriibwärchschtatt var Walsrvreinigig Graubündä ischt all Jaar für mi ä Höhäpunkt und än uusgschprochnä Chraftort. Da lärnend miär Dialektschriibrnä und -schriibr sövl Nüüsch und nutzend di Gglägäheit, ünsch mid allm uuszrüschtä, wa für ünschi Teggscht brünzlig wärtvoll ischt. Da he mr ärischthafti Teemä, abr au etlismal luschtägi und undrhaltsami Uufgabä. Däheimet de bim schriibä chö mr us m Vollnä schöpfä und ünschnä Hirngschpinntschti friiä Lauf laa. In dr frischä Bärgluft und dr warmä Sunnä sind bi ünsch Früäligsgfüül erwachet. D Vögäli erläblähend scho biziitä am Morget. Äs ischt wooltuänd, wenn sch pfiiflä mögend und dr Wintr langsam zemäpackt.

Wiä hes de du mid dä Tiäri? Bischt du ä Tiärlifründi? Hescht alli Viichli gärä? Freut s di au, wenn d Meisli und di ganz Voglpagaaschi widr zwitschäränd und ds maarflä* Gfleug us allnä Schpält fürcher chrüücht? Grundsätzli han i gar alli gärä, vam Härzchäfrli, Mischtguägä bis zär ghoornätä Chuä. Abr nu sä lang sch mi lä sii löönd. Also, wenn dr Pless vam Nachpuur mi in d Wadä biisst odr ä roti Ameisä mi aabrunzet, de hört s uf mid dr Liäbi. De muäss i driischlaa odr au ämal schperzä. I freegä mi äsiä au, wiäso as albig di Tiäri für äs was härhebbä müässend, und nä miär Menschä Züüg aalaschtend, wa schi gär nid sind und wa schi schi drgäget nid werrä chönnd. Tummä Aff, blödi Chuä odr arms Chalb seid mä no bald ämal. Das ischt nid grad gfluächät abr uuwörtig. Drbii sind diä Kreatuurä uf gär kei Fall blöd odr tumm. Wenn sch redä chönntend seitend sch zä ünsch gwüss au äsiä, diä uuvrschammtä Mentschä.

Ja, und värrückt hed s mi tunkt, wa sch Wärbig gmachet hend für dä Sirenätescht. Da hed ä Daniel-Düsätrieb-Maschinä bigoscht im Fernsee dm Schaf ä Singälä zäm Grind ggee und de ischt d Sirenä losgangä. I han dem Schaf uuheimli erbarmet und grad a miini Laurä tenkt. Das ischt miis Liäblingsschaf gsi zä Goofä-ziitä und das ischt de im Fall ä ganz ä Gschiidi gsi. Niä im Läbä hett i derä eis putzt und schi hetti bhaupt i au grad z Trotz nid plääret.

Etz bin i widr däheimet mid ä huufnä Ideeä im Chopf. I freuä mi etz scho uf di nüüä Gschichtä, wa mini frisch ggladdnä grauä Hirnizällä fabriziärend. I will de au di eint odr di andr äswemm fürläsä.

Tiärisch liäbi Grüäz schick dr etz us miir Schriibärii, ds Riissblii weer afä gschpitzts.

Härzli Margrith

*«maarfl» heisst: noch schlaftrunken, noch unbeweglich, klamm vor Kälte.