Feissti Chlempernä

Äs freut mi, wenn r s hübsch kha hend übr d Oschtärä. Etz hed nisch halt dr Wäärtig widr und miär sind widr im Schtollä. I han zwar nid sövl schtreng wiä du. Minä Schtollä ischt mee odr mindr gmüätli und ooni Ghetz. Han etz grad au namisch z tuä. Ettli Läsägä und Schriibarbätä, abr das tuän i ja gärä. Wenn i äswannä ä luschtägi Gschicht fürläsä, de chan i dä Lüüt Freud machä und das macht miär au ä narrä Freud. I han s vrdaalisch gärä Luschtig mid dä Lüüt. Ä Tschuppä Jaar han i am Konzertaabet va ünschr Musiggsellschaft dür ds Programm gfüärt. Und as Uuflockärig han i zümpftägi Prättigrwitz erzellt. Hettischt söllä khörä, wiä diä Gaschtig gglachet hed. Ä teil hend gseit, schi chemend nid zletscht wägä miinä Witz an dä Musigabet. Denk, wa i jung gsi bi, und übrall an Turnuusbildägä bi, he mr meischtens i Massälagr übrnachtet. Und wenn de alls äso müüslischtillä ischt gsi, han i ds Trudi Gärschtr uusggantärät* und äs Gschichtäli va dä chleinä Hötschli nachigmachet. Diä Turnkollegänä hend allimaal villä in d Hosä prunzet vor luutr lachä. I han s gärä luschtig und fideel, bi lüütselig und viil uf dr Faart gsi. Mini Mamä hed gmeint, diä Umrteuflig hei i ämal nid va irä. Janu, bi etz afä rüäbägr cho. Abr albig nu umrhockä ischt mr z lengwiilig. Bin scho ättä uf dr Schifrweid, gan gruusig gärä zäm Aperööli, ja au will i Wundr ha, was Nüüsch gid. Will mi Maa sövl uuheimli gärä jasset, han i s au no gglärnet und de tüä mr hi und da mid guätnä Kollegä ä Schiäbr machä. Miär Wiibävölchr vrlüürend fascht albig, abr das trääge mr mid Fassig. Was dr no ha wellä sägä: Fäärä bischt du doch z Seewis gsi, gä Narzissä fotigrafiärä. Etz sind sch widr i vollnr Pracht am blüä und bi ünsch uf m Maiäsäss ischt eis wiisses Meer va denä Geissblüämli, wiä nä d Seewiser sägend. Dr Bärgfrüälig ischt ganz gewaltig hübsch. In allnä Farbä lüchtet s und ds Gfleug ischt i rä Viilfalt va grossnä mächtägä Sachä abor. Söttischt ämal diä Ameisä gsee. Uuunarrä Teuflä!! Weischt äso grossi, feissti Chlempernä, mid Obrschenkl, dass dm Tüükr drab gruusäti. Abr zä mim Erschtuunä sind s de gwüss no flotti. Biissä tüänt sch eim nid. Abr schi sind leschtig aahengli. Aahebbig ischt au dr Gugguusr. Där vrfüärt ä Ggaleerä und will de nümä hörä rüäfä. Ünschä Hasäbuäb, wa alib ob m Hütti umrghopplät ischt, han i hüür no nid gsee. Nümt mi wundr, ob r no läbt. Und bald choment di chleinä Rehgitzäli. Wenn sch de ämal mid dr Mamä undrwägs sind, de mögend diä umrschpringä, hüpfä und dür d Schtuudä zwärlä. Ä narrä Wundr hend diä chleinä Rehli. Wemä ganz rüäbig ischt und schi nid vrmüfärät, choment sch eim sövl nach, dass mä schä gglenggä mögdi. Bi der Gglägäheit no ä Frag. Was meinscht, was ischt äs Reh, ä Schpringr, ä Schlüpfr odr ä Hüpfr? Zuäträffend ischt: Äs Reh ischt ä Schlüpfr, will s dür all Gäbüschi düürä schlüüft. Wenn i Glück ha, schick dr äs Fötäli. Mach s guät und bliib gsund.

Ä liäbä Gruäz, Margrith

*«uusantärä» heisst: nachmachen.