Skip to content

Heissi Marrä und Wiiwarm

Diese Kolumne zeigt den Briefwechsel zweier Frauen. Ihre Dialekte könnten unterschiedlicher kaum sein: Prättigauer Dialekt trifft auf Domleschger-/Churerdeutsch.

Sali Lara

I ha de scho liäbr warm as chalt. Geschtr gägät Iinachtä bin i muusseelä ällei däheimet gsi und de han i ünschä Schpäckschteiofä iigfüüret, dr Chriäsimaa ins Ofäröörli gschoppet, äs Aperööli gmischgglet und s eifach nu gnossä. Derä Augäblick sind usägäli hübsch und lönd eim lä gschpürä, wiä hübsch as mäs s hed. De denk i an diä huufä Lüüt, wa müänd im Chriäg läbä, wa Hungr liidend und wa keis Däheimet hend. Di ganz Hantiärig uf dr Wält schlat eim uf ds Gmüät und mä übrchunnd biwarischt villä äs schlächts Gwüssni. Ä wärschaftä Prättigauer hed miär grad di letscht Wuchä gseit, wiä dankbar dass är sii, dass nä dr Liäbgott da härä ins hübschä Prättigau ghöckt hei. Diä Uussag hed mi teuf beiidruckt.

I cha mr fürschtellä, dass dinä Neni än uu Freud hed an diär. Är hed gwüss ä narrä Meinig, mit ämä Enkäli im Höörsaal. Und so wiä i läsä, bischt du äbiz ä Schportkanonä. Secklä, Schgiifaarä, Schwimmä und Bärgwandärä, woll, woll, da geid äswas! Mit ämä so ä Servismaa ischt das au keis Wundr. Geischt äsiä au mid dim Schgiipreparatör uf di Pischtä? Bis vor wenig Jaar bin i natürli au dick und viil übr di Pischtä gflitzt. De hed das schteetli äs bitschi ggendärät und i bi mee an dr Schneebar und uf dr Sunnäterrassä aazträffä gsi und han dr Schnee dä andärä Gescht übrlaa. Weischt, i tuän vrdaalisch gärä Lüüt luägä. Etz um diä Ziit gfallts mr au in dr Schtadt gnarret guät. Äs ischt äsiä zwar ä schwii Ggöörä, abr mit ämä Schgarnutz heissnä Marrä odr mit ämä viil z süässä Wiiwarm uf ämä Benkli mag i s de scho gmachä. Diä vrschidnä Fasoonä va Lüüt und ds Aaglegg, wa sch hend, ischt wiä imä Film. Ä Teil schlärggend, ä Teil ggruupend, derä, wa bösch drii luägend hed s und andäri wa lüütseeligr sind. De schärmiziäränd no diä umr mit und ooni Haar und dischi mit ämä Tschäppl odr äbä diä ooni Chappä. Bis i mis Schgarnützli ggleert ha ischt di ganz Palettä va grossnä und chleinä, va dicknä und megrlichtnä Lüüt vrbii und nid nu minä Magä, nei au mini Augä sind für ä Schwick wackr gfuätärät. Äsiä rüäft sogär äswär, wa i chennä, und äsiä nütt* einä nu äso zippärtig, und de weiss i grad, där mag schi nümä psinnä, ob r mi chennt odr nid. Äs ischt au scho fürcho, dass i eini va früjer erlickt und de ggrüäft han. Abr äbä, diä khhört truäti nümmä grad guät, schi tuät ämal nid Eggwerri. Äs hed de abr andäri, wa vrdutzt driiluägend, wenn i äso ä Ggaleerä vrfüärä. De schiniär i mi grad gröbli und muäss minä Pölli hindr m Marräschgarnutz vrschteckä. I freuä mi uf diä Ziit, wa chund. Han s gärä heimälig und warm.

I wünsch dr ganz ä hübschi Ziit und schick dr liäbi Grüäz, Margrith

* «nütt» heisst: Nicken, stummer Gruss

Kirche Seewis mit Schesaplana im Hintergrund.

Über «Mid liäbnä Grüäz und LG» und die Autorinnen

Diese Kolumne zeigt den Briefwechsel zweier Frauen – eine hat gerade mit dem Studium begonnen, die andere ist im Ruhestand. Sie schreiben über Gott und die Welt und manchmal auch über das, was sie an der jeweils anderen Generation nicht so ganz verstehen. Sogar ihre Dialekte könnten unterschiedlicher kaum sein: Prättigauer Dialekt trifft auf Domleschger-/Churerdeutsch.

Margrith Ladner-Frei, geboren 1949, ist in Schiers-Schälleria aufgewachsen. Seit mehr als 50 Jahren lebt sie nun in Grüsch. Traditionen, alte Bräuche, Menschen und ihre Geschichten, Gesetze der Natur, die Schöpfung und ihre Kreaturen und besonders die Sprache der Walser interessieren die Schreiberin sehr. Sie hat schon einmal für die «Büwo» geschrieben und hat bereits viel Erfahrung gesammelt, was die Sprache und unsere Dialekte betreffen.

Lara Buchli, geboren im Jahr 2003, ist in Zizers aufgewachsen. Zur Zeit studiert sie an der ZHAW in Winterthur. Tiere, die Natur, Krimis und Horror findet sie super. Sie hat ihr Praktikum bei der «Büwo» absolviert und schreibt seit Jahren hobbymässig und konnte so bereits Erfahrung sammeln, was das Schreiben und die deutsche Sprache angeht.

Alle Beiträge der Kolumne
gibt es hier zum Nachlesen.