Stöck und Böck

Grüäzi, grüäzi Lara

Dankä für dä Briäf mit dr rätslhaftä Übrschrift. «Yazzy». Was ischt etz das widr für äs Tiär? I han weidli guuglet, dass i uf m nüüschtä Schtand sii und mitredä chönn. Wenn i s richtig gschnallt, äboz vrschtandä han, ischt das äs Würflschpiili mit Personäbeteiligig und ämä Bock!? I nümä nid aa, dass das ä Rehbock ischt. Äs chönnti truäti ehendr ä Gitzibock sii. Ja nusä, i chennä das Schpiili uf all Fäll nid. Miär ischt nu «Eile mit Weile» und dr «Schwarz Petsch» ä Bägriff. Und wiä s schi khört, tuän i als Eidgenossi natürli au ättä äs Jass chlopfä. Abr natürli nu mid Kollegä wa mi nid stendig pschuldigänd, und miär fürhebend, was i alls hetti müässä merkä. Wenn dr eint Härz aazücht und dischä d Schuuflä zrwürft, müässt i äbä merkä, wa Has lauft. Gan i uf ä sichärä Schtich us heissts, i törf ds Pulvr nid grad zerschtwärch vrschüüssä. Di Böck hett i lengschtä söllä schpillä (bim Jassä hed s im Fall au Böck, we mä s merkti!)! Bi dr aagreggte Diskussio nachär seit dr andr, är hei nüd chönnä machä, är hei di Dam plutt kha. Da chunnd mä ja no villlä rot…

Du hescht mi no uf d «Open Airs» aagschprochä. Ja, ja, au i ha mini Open-Air-Karrieerä kha. Abr natürli äs bitschi andrscht as du. Vam chleinä Regionalturnfescht, übr kantonali und eidgenössäschi Wettchempf bis zä dä Wältturnfeschti mit Vorfüärägä ds Amsterdam, ds Göteborg, ds Herning und sus no überall. Das sind uuvrgässlächi Erläbnis gsi. Weischt, we mä mid dr Schwizrdelegation darf in äs gross mächtigs Stadion iilaufä mit tuusägnä va Turnrnä und Turnr va dr ganzä Wält, de hennähuutät s eim scho grad äs bitschi. Diä Feschtr hend nid gnuäg wiit fort chönnä sii. Wiäso? Ja, dass mr am Abet nid hei hend müässä und in dä Feschtzälti hend chönnä fiirä und tanzä bis di Benk villä zemäpräglet sind. Ds Gliggr he mr meischtens äswa irä Turnhallä odr Zivilschutzalag kha. Va schlafä natürli kei Red. Das ischt viil z uurüäbig gsii. Allpot ischt äswär cho odr nochämal ggangä, odr sant dm Fäldbett obänübr troolet. Ä Teil hend gschnarchlet und dischi ggigärät und bischmät bis s äswannä us ämä Egg ä Schnarz taa hed: «Ruä»! Äs cheeme mr no ganz ä huufä Zinnd. Miär Senioräturnrnä sägend ettlis Mal: «Weischt no…»? Hübsch ischt diä Ziit gsi und nachhaltig. I bi froo, han i das alls törfä erläbä. Musig Openair ischt nid äso miis. Ja, preziis äso is, jedi Ziit ischt wiä sch ischt. Ä teilnä Sachä truurät mä nachi und andrs ischt au rächt, wenn s vrbii ischt. Bis z nechscht Mal.

Liäbi Grüäz

Margrith

*äboz heisst: ohä lätz, respektive